*मलकापूर:* वर्तमानातील धावपळीच्या आणि तंत्रज्ञानाच्या युगात मानवी मूल्यांची जपणूक करणे ही काळाची गरज बनली आहे. याच उदात्त हेतूला समोर ठेवून, स्थानिक लोक सेवा शिक्षण बहुउद्देशीय मंडळ संचालित, पद्मश्री डॉ. व्ही. बी. कोलते कॉलेज ऑफ इंजिनिअरिंग, मलकापूर येथे अखिल भारतीय तंत्रशिक्षण परिषद पुरस्कृत 'युनिव्हर्सल ह्युमन व्हॅल्यूज - II' या विषयावर पाच दिवसीय भव्य फॅकल्टी डेव्हलपमेंट प्रोग्रामचे आयोजन करण्यात आले आहे. दि. २३ मे ते २७ मे २०२६ या कालावधीत ही कार्यशाळा महाविद्यालयाच्या प्रांगणात पार पडणार असून, 'एक सुसंवादी, नैतिक आणि मूल्यधिष्ठित समाजाची निर्मिती' हे या कार्यक्रमाचे मुख्य उद्दिष्ट आहे. शिक्षण क्षेत्रात कार्यरत असलेल्या प्राध्यापकांमध्ये नैतिक दृष्टिकोन, सर्वांगीण विकास आणि व्यावसायिक सचोटी निर्माण करण्यासाठी हा उपक्रम अत्यंत महत्त्वाचा मानला जात आहे.
आजच्या शिक्षण पद्धतीत केवळ पुस्तकी ज्ञान किंवा तांत्रिक कौशल्ये पुरेशी नसून, विद्यार्थ्यांसमोर आदर्श ठेवण्यासाठी स्वतः शिक्षकांमध्ये मानवी मूल्यांची रुजवणूक होणे आवश्यक आहे. याच भूमिकेतून या पाच दिवसीय कार्यशाळेची आखणी करण्यात आली आहे. या कार्यक्रमादरम्यान तज्ज्ञ मार्गदर्शकांकडून परस्पर संबंधांमधील विश्वास, आदर, स्नेह आणि कृतज्ञता यांसारख्या मानवी मूल्यांवर सखोल मार्गदर्शन केले जाणार आहे. विशेषतः अभियांत्रिकी सारख्या तांत्रिक क्षेत्रात काम करताना सामाजिक जबाबदारी आणि नैतिकतेचे भान कसे राखावे, यावर या कार्यशाळेत विशेष भर दिला जाणार आहे. महाविद्यालयाने या उपक्रमाद्वारे केवळ शैक्षणिकच नव्हे तर सामाजिक परिवर्तनासाठी एक सकारात्मक पाऊल उचलले आहे.
या राष्ट्रीय स्तरावरील कार्यक्रमासाठी विविध अभियांत्रिकी महाविद्यालयातील प्राध्यापक उपस्थित राहणार आहेत. कार्यक्रमाच्या यशस्वीतेसाठी महाविद्यालयाचे व्यवस्थापन आणि प्राचार्य डॉ अनिल खर्चे, प्रशासकीय डीन डॉ. युगेश खर्चे, आयक्युएसी अधिकारी प्रा. रमाकांत चौधरी यांच्या मार्गदर्शनाखाली समन्वय समिती कार्यरत आहे. नोंदणी प्रक्रियेसाठी महाविद्यालयाने डिजिटल माध्यमांचा वापर केला आहे. कार्यक्रमाच्या नोंदणीसाठी तसेच अधिक माहितीसाठी समन्वयक प्रा. पी. बी. भिसे (मो. ७७२००८०३५४) आणि प्रा. ख्याती चौधरी (मो. ८२६१०८४३३१) यांच्याशी संपर्क साधवा असे आवाहन कॉलेज प्रशासनाच्या माध्यमातून करण्यात येत आहे. मलकापूर सारख्या शैक्षणिक केंद्रात अशा प्रकारच्या उच्च दर्जाच्या कार्यशाळेचे आयोजन केल्याबद्दल शिक्षण क्षेत्रातून महाविद्यालयाचे कौतुक होत आहे. या उपक्रमामुळे प्राध्यापकांना आपल्या अध्यापन शैलीत आणि वैयक्तिक आयुष्यात मूल्यांची अंमलबजावणी करण्यास मोठी मदत होणार आहे.