चाळीसगाव (वार्ताहर):
शिक्षण म्हणजे केवळ अभ्यासक्रम नव्हे, तर चारित्र्य घडविणे, आत्मविश्वास निर्माण करणे आणि उज्ज्वल भविष्याची पायाभरणी करण्याची प्रक्रिया होय. या विचाराला प्रत्यक्षात उतरवत शहरातील नामांकित अल-सलाम इंग्लिश स्कूल, चाळीसगाव यांच्या वतीने इयत्ता दहावीच्या विद्यार्थ्यांसाठी एकदिवसीय भव्य शैक्षणिक मार्गदर्शन कार्यक्रम “आम्ही नक्की यशस्वी होऊ” यशस्वी व संस्मरणीय पद्धतीने पार पडला. या कार्यक्रमाने विद्यार्थ्यांच्या मनात आत्मविश्वास, धैर्य आणि यशाची नवी ज्योत प्रज्वलित केली.
या शैक्षणिक उपक्रमाचा मुख्य उद्देश विद्यार्थ्यांना बोर्ड परीक्षेची प्रभावी तयारी, योग्य शैक्षणिक दिशा आणि आत्मविश्वास प्रदान करणे हा होता. या उपक्रमात शहर व परिसरातील विविध शाळांमधील सुमारे ३०० विद्यार्थ्यांनी सहभाग नोंदवला, ज्यातून या कार्यक्रमाची उपयुक्तता व लोकप्रियता स्पष्ट झाली.
कार्यक्रमात जळगाव येथील अनुभवी व तज्ज्ञ शिक्षकांनी विद्यार्थ्यांना मार्गदर्शन केले. विज्ञान विषयाचे नामवंत तज्ज्ञ व करिअर समुपदेशक आरिफ मोहम्मद खान यांनी आपल्या प्रभावी शैलीत विषय समजावून सांगत विद्यार्थ्यांना भविष्यातील दिशा ठरवण्याचे कौशल्य दिले.
गणितातील अवघड प्रश्न सोप्या व रंजक पद्धतीने मांडण्याचे कार्य मोहम्मद साजिद अब्दुल रज्जाक (सेवानिवृत्त पर्यवेक्षक, एंग्लो-उर्दू हायस्कूल, जळगाव) यांनी केले.
तसेच इंग्रजी भाषा व साहित्य विषयाचे मार्गदर्शन शेख इफ्तिखार गुलाम रसूल (इकरा शाहीन हायस्कूल, मेहरून) यांनी अत्यंत सुंदर पद्धतीने केले, ज्यामुळे विद्यार्थ्यांचा आत्मविश्वास लक्षणीयरीत्या वाढला.
या प्रसंगी अल-सलाम इंग्लिश स्कूलचे मेंटॉर सैयद झहीर अब्दुल खालिक यांनी परीक्षेच्या तयारीचे सुवर्ण सिद्धांत, वेळेचे नियोजन आणि मानसिक तणावावर मात करण्याच्या उपायांवर सखोल मार्गदर्शन केले, जे विद्यार्थ्यांसाठी मार्गदर्शक ठरले.
या यशस्वी शैक्षणिक मोहिमे मागे मुख्याध्यापक सैयद इमरान यांच्या नेतृत्वाखाली संपूर्ण टीमची अथक मेहनत होती. मोहसिन हसन खान, समीर शेख, कामरान शेख, शादाब खान तसेच इतर सहकाऱ्यांनी दाखवलेला उत्साह, शिस्त आणि समन्वय अत्यंत प्रशंसनीय ठरला.
कार्यक्रमाच्या शेवटी विद्यार्थी व पालकांनी या शैक्षणिक मार्गदर्शन उपक्रमाला काळाची गरज असल्याचे नमूद करत शाळा प्रशासनाचे आभार मानले आणि भविष्यातही असे उपयुक्त व प्रेरणादायी कार्यक्रम आयोजित व्हावेत, अशी अपेक्षा व्यक्त केली.